अजिंक्य रहाणेला लॉटरी! सुनील गावस्करांचा ‘तो’ भूखंड अखेर मिळाला; महाराष्ट्र सरकारचा अधिकृत आदेश जारी

मुंबई/महान कार्य वृत्तसेवा
टीम इंडियाचा स्टार प्लेयर अजिंक्य रहाणे याला लॉटरी लागली आहे. मुंबईच्या पॉश वांद्रे भागात एक स्पोर्ट्‌‍स कॉम्प्लेक्स विकसित करण्यासाठी 2,000 वर्ग मीटरची जमीन अजिंक्य रहाणेला भाडेपट्ट्यावर देण्याचा निर्णय घेतला होता. अशातच आता महाराष्ट्र सरकारने अधिकृत आदेश जारी करत अजिंक्य रहाणेला हा भूखंड दिला आहे. वांद्रे येथील अत्यंत मोक्याच्या जागेवर असलेल्या या 2000 चौरस मीटर भूखंडाची अजिंक्य रहाणे यानं मागणी केली होती. 23 सप्टेंबर 2024 ला राज्य सरकारने तत्वत: मान्यता दिली होती. अशातच आता अधिकृत घोषणा करण्यात आली आहे.
युवा चॅम्पियन घडवण्याची जबाबदारी
महान क्रिकेटर सर सुनील गावस्कर यांना 1988 साली हा भूखंड सरकारने दिला होता. मात्र, कोणतंही काम न झाल्याने परत घेतला होता. अशातच आता क्रिकेट प्रशिक्षण केंद्र यात बदल करून क्रिकेट आणि क्रीडा प्रशिक्षण हा अंशत: बदल करून प्रदान करण्यात आला आहे. या केंद्रात युवा चॅम्पियन घडवण्याची जबाबदारी अजिंक्य रहाणेवर असणार आहे. मात्र, या मोक्याच्या भूखंडावर सध्या अतिक्रमणाचा वेढा असल्याने अजिंक्य रहाणेच्या चिंता वाढू शकतात. आसपासचे झोपट्टीधारक याचा वापर करतायेत. म्हाडाने सरकारला हस्तांतरीत केलेल्या या भूखंडाला अतिक्रमण मुक्त केलं जाणार आहे.
आशिष शेलारांनी लिहिलं होतं पत्र
भारतीय क्रिकेट नियामक मंडळाचे म्हणजेच बीसीसीआयचे माजी खजिनदार तसेच भारतीय जनता पार्टीचे आमदार आशिष शेलार यांनी एका पत्राच्या माध्यमातून क्रिकेट अकादमीसाठी मंजूर झालेला मात्र गावसकर यांनी अकादमी उभारण्यास असमर्थता दाखवलेला भूखंड अजिंक्य रहाणेला द्यावा यासाठी मुंबई म्हाडा मंडळाला पत्र लिहिलं होतं. शेलार यांच्या या मागणीवर मंडळाने रहाणेला भूखंड देण्याचा निर्णय घेतला होता.
भूखंडाची किंमत किती?
अजिंक्य रहाणेला मिळालेला सदर भूखंड हा 2 हजार स्वेअर मिटर आकाराचा आहे. हा भूखंड लिलावती रुग्णालयात आणि पश्चिम द्रुतगती मार्गाजवळ आहे. येथील खासगी भूखंडाची किंमत प्रती स्वेअरफूट 50 हजार रुपये ते 1 लाख रुपयांदरम्यान आहे. त्यामुळे अगदी किमान किंमत म्हणजेच 50 हजार रुपये प्रति स्वेअर फूटने विचार केला तरी या भूखंडाची किंमत 10 कोटींपर्यंत जाते.
अजिंक्य रहाणेची कारकीर्द
अजिंक्य रहाणे हा भारताचा स्टार फलंदाज असून त्याने काही सामन्यात टीम इंडियाचे नेतृत्व सुद्धा केले आहे. अजिंक्य रहाणे याने भारताकडून 85 टेस्ट क्रिकेटमध्ये 5077 धावा, 90 वनडेमध्ये 2962 धावा केल्या तर 20 टी 20 सामन्यात 375 धावा केलाय आहेत. अजिंक्य रहाणेने आयपीएलमध्ये राजस्थान रॉयल्सचे सुद्धा नेतृत्व केले असून सध्या तो चेन्नई सुपरकिंग्सकडून खेळत आहे. अजिंक्यने आयपीएलमध्ये 4642 धावा केल्या आहेत. क्रिकेटच्या सर्व फॉरमॅटमध्ये अजिंक्य रहाणेच्या नावावर 15 शतक आहेत.