मुंबई/ महान कार्य वृत्तसेवा
शिवसेना शिंदे गटाच्या नेत्यांची सुरक्षा कपात करण्यात आली आहे. शिवसेनेच्या आमदार आणि नेत्यांना वाय दर्जाची सुरक्षा होती. ज्या नेत्यांच्या जीवाला कोणताही धोका नाही अशा शिवसेनेच्या नेत्यांची सुरक्षा कमी करण्यात आली आहे. यामध्ये माजी मंत्री आणि शिवसेनेचे विद्यमान आमदार तानाजी सावंत यांचाही समावेश आहे. सावंत यांना मंत्री असताना त्यांनी हट्टाने त्यांच्या सुरक्षेसाठी 48 पोलीस कर्मचारी नियुक्त करुन घेतले होते. मात्र, ते आता मंत्री नसल्यानं त्यांची सुरक्षाव्यवस्था काढून घेण्यात आली आहे. त्यांना केवळ एकच सुरक्षारक्षक पुरण्यात आला आहे.
तत्कालीन मुख्यमंत्री एकनाथ शिंदे यांच्या मंत्रिमंडळात तानाजी सावंत हे आरोग्यमंत्री होते . मंत्रिपदाचा दर्जा असल्याने त्यांना वाय दर्जाची सुरक्षा होती. ज्यामध्ये चार कर्मचारी आणि एका वाहनाचा समावेश असणं अपेक्षित होतं . मात्र, तानाजी सावंतांनी त्यांच्या सुरक्षेसाठी पुणे पोलीस दलातील तब्ब्ल 48 पोलीस कर्मचारी आणि तीन वाहने नियुक्त करुन घेतली होती. तानाजी सावंत त्यांचा उपयोग त्यांच्या कार्यालयासमोर बंदोबस्त तैनात करण्यासाठी, त्यांच्या घरासमोर बंदोबस्त तैनात करण्यासाठी आणि ते जिथे जातील तिथे त्यांच्यासोबत कर्मचाऱ्यांचा ताफा नेणयासाठी करत होते. त्याचा ताण पुणे पोलीस दलावर पडत होता. त्यामुळं पोलीस आयुक्त अमितेश कुमार यांनी तानाजी सावंत यांच्या सुरक्षेसाठी असलेले पोलीस कर्मचारी कमी करणायचा प्रयत्न केला होता. ही संख्या 15 वर आणली होती. मात्र, तानाजी सावंतांनी एकनाथ शिंदेंमार्फत पोलीस आयुक्तांवर दबाव आणून पुन्हा पाहिल्याएवढे पोलीस कर्मचारी स्वत:च्या सुरक्षेसाठी नियुक्त करुन घेतले होते. मात्र, आता तानाजी सावंत मंत्री नसल्यानं त्यांची सुरक्षाव्यवस्था काढून घेण्यात आली आहे. सावंत यांना आता आमदार म्हणून केवळ एक सुरक्षारक्षक पुरवण्यात आला आहे.
