अधिकारी बदल्यांमुळे व अनुभवाचा अभाव असल्याने शहराचा विकास ठप्प

कुरुंदवाड/महान कार्य वृत्तसेवा
142 वर्षांची परंपरा असलेल्या कुरुंदवाड नगरपालिकेच्या प्रशासकीय कामकाजावर मागील तीन वर्षांपासून प्रशासकांचाच वरचष्मा आहे. 1883 मध्ये स्थापन झालेल्या या ऐतिहासिक नगरपालिकेत लोकप्रतिनिधी नसल्याने विकासकामांना मोठा फटका बसला आहे. विशेष म्हणजे, पहिल्यांदाच या नगरपालिकेतील सर्व विभागांमध्ये महिला अधिकारी कार्यरत असून ‘महिलाराज’ दिसून येत आहे. मात्र, अधिकारी बदल्यांमुळे व अनुभवाचा अभाव असल्याने शहराचा विकास ठप्प झाला आहे.
शंभर वर्षांच्या या पालिकेवर सध्या जयसिंगपूरच्या मुख्याधिकारी टीना गवळी यांच्याकडे अतिरिक्त कारभार सोपवण्यात आला आहे. मात्र, येथे कायमस्वरूपी मुख्याधिकारी नाहीत, यामुळे अनेक विकास योजना रखडल्या आहेत. नागरिकांकडून कायमस्वरूपी मुख्याधिकारी नेमण्याची मागणी होत आहे. प्रशासक असल्यानं निर्णयप्रक्रियेत विलंब होत असल्यामुळे शहराच्या विकासाला खीळ बसली आहे.
शहराच्या सर्वांगीण विकासासाठी येथे स्थायी मुख्याधिकारी नेमावा, अशी मागणी नागरिक व सामाजिक संघटनांकडून केली जात आहे. महिला अधिकारी योग्य प्रकारे काम करत असल्या तरी, प्रशासनाचा अनुभव कमी असल्याने विकासकामांना गती मिळत नाही. त्यामुळे शासनाने तातडीने योग्य तो निर्णय घ्यावा, अशी मागणी होत आहे.

महाशिवरात्र नियोजनाबाबत संभ्रम

दरवर्षी मोठ्या उत्साहात साजरी केली जाणारी महाशिवरात्र सण तोंडावर आला असताना यंदा त्याचे नियोजन कसे होणार, हे अद्याप निश्चित झालेले नाही. याबाबत 31 जानेवारी रोजी नगरपालिकेच्या दालनात नागरिकांची बैठक आयोजित करण्यात आली आहे. या बैठकीत महाशिवरात्र उत्सवाबाबत महत्त्वाचे निर्णय घेतले जाणार असून, त्याकडे संपूर्ण शहराचे लक्ष लागले आहे.

कर वसुली जोरात, पण विकास मंदावलेला

नगरपालिकेकडून कर वसुली जोरात सुरू आहे, मात्र शहरातील विकासकामे मंदावलेली आहेत. प्रशासक असल्यानं मोठ्या प्रकल्पांना मंजुरी मिळण्यात अडथळे येत आहेत. नागरिकांनी अनेक वेळा तक्रारी केल्या असल्या तरी ठोस उपाययोजना होत नाहीत. पथदिवे, रस्ते दुरुस्ती, गटार सफाई यासारखी मूलभूत कामेही रखडली आहेत.