चंदीगढ / महान कार्य वृत्तसेवा
सोमवारी पंजाबमधील जालंधर इथं झालेल्या रस्ते अपघातात ज्येष्ठ मॅरेथॉन धावपटू फौजा सिंग यांचं निधन झालं आहे. ते 114 वर्षांचे होते. त्यांच्या मृत्यूची पुष्टी लेखक खुशवंत सिंग यांनी केली, जे पंजाबचे माजी राज्य माहिती आयुक्त होते आणि त्यांनी फौजा सिंग यांच्यावर ‘द टर्बंडेड टॉर्नाडो’ नावाचं चरित्र देखील लिहिलं होतं.
जालंधरच्या एका पोलिस अधिकाऱ्यानंही फौजा सिंग यांच्या मृत्यूची पुष्टी केली आणि सांगितलं की, ते बियास गावात फिरायला गेले असताना एका अज्ञात वाहनानं त्यांना धडक दिली. फौजा सिंग यांच्या डोक्याला दुखापत झाली, त्यानंतर त्यांना एका खाजगी रुग्णालयात नेण्यात आलं, जिथं संध्याकाळी त्यांचा मृत्यू झाला. जालंधरमधील आदमपूर पोलिस स्टेशनचे एसएचओ हरदेवप्रीत सिंग यांनी सांगितले की, अपघातानंतर चालक, ज्याची ओळख अद्याप पटलेली नाही, तो पळून गेला. पण चालकावर निष्काळजीपणे गाडी चालवल्याचा गुन्हा दाखल करण्यात आला आहे.
पंतप्रधान मोदींनी व्यक्त केल्या शोकसंवेदना : पंतप्रधान नरेंद्र मोदी यांनी फौजा सिंग यांच्या निधनाबद्दल शोक व्यक्त केला. सोशल मीडियावर एका पोस्टमध्ये पंतप्रधानांनी लिहिलं की, ‘फौजा सिंग जी त्यांच्या अद्वितीय व्यक्तिमत्त्वामुळं आणि फिटनेससारख्या महत्त्वाच्या विषयावर भारतातील तरुणांना प्रेरणा देण्याच्या पद्धतीमुळं असाधारण होते.’ ते एक असाधारण खेळाडू होते ज्यांच्यात अविश्वसनीय दृढनिश्चय होता. त्यांच्या निधनानं मला खूप दु:ख झाले. त्यांच्या कुटुंबियांसोबत आणि जगभरातील त्यांच्या असंख्य चाहत्यांसोबत माझ्या संवेदना आहेत.’
फौजा सिंग कोण होते?
1911 मध्ये एका शेतकरी कुटुंबात जन्मलेले फौजा सिंग हे चार भावंडांमध्ये सर्वात लहान होते. वयाच्या 100 व्या वर्षी मॅरेथॉन पूर्ण करणारा तो पहिला खेळाडू ठरला आणि आंतरराष्ट्रीय स्पर्धांमध्ये भाग घेताना त्यांनी अनेक विक्रमही प्रस्थापित केले.
फौजा सिंग यांनी म्हातारपणी मॅरेथॉन धावण्यास सुरुवात केली आणि त्यांच्या सहनशक्ती आणि क्रीडा क्षमतेमुळं त्यांना ‘टर्बेन्ड टॉर्नाडो’ हे टोपणनाव मिळालं. 1990 च्या दशकात ते इंग्लंडला गेले आणि नंतर पंजाबमधील त्यांच्या वडिलोपार्जित गावी परतले.
2012 च्या लंडन ऑलिंपिकमध्ये ते मशालवाहकही होते. 1999 मध्ये फौजा सिंग यांनी धर्मादाय संस्थेसाठी मॅरेथॉन धावण्याचा निर्णय घेतला. त्यांचा असा पहिलाच धर्मादाय कार्यक्रम अकाली जन्मलेल्या बाळांसाठी होता.
2013 मध्ये, फतेहगढ साहिब येथील स्थानिक शाळेत सन्मानित झालेल्या फौजा सिंग यांनी सांगितलं की त्यांचं एक ध्येय शीख संस्कृतीची समज वाढवणं आहे. ते म्हणाला, ”माझ्या दाढी आणि पगडीनं जगात माझा आदर वाढवला आहे आणि मी देवावर विश्वास ठेवतो… म्हणूनच मी माझ्या जीवनातील ध्येयं साध्य करु शकलो.” हे 114 पानांचं चरित्र फौजा सिंग यांची जीवनाबद्दलची उत्सुकता आणि त्यांचा अजिंक्य आत्मा दर्शवतं.