नांदणीच्या माधुरीसाठी ठाकरे यांना सकाडे

जिल्हाप्रमुख संजय चौगुले यांची उद्धव ठाकरे यांच्याकडे मागणी

कोल्हापूर/ महान कार्य वृत्तसेवा

  नांदणी येथील 1200 वर्षांची परंपरा लाभलेल्या मठातील माधुरी नावाची हत्तीण, न्यायालयाच्या आदेशानंतर गुजरातमधील जामनगर येथील ‘वनतारा’ प्राणी संवर्धन केंद्रात स्थलांतरित करण्यात आली आहे. या निर्णयामुळे कोल्हापूरसह महाराष्ट्र आणि कर्नाटकातील लाखो भाविकांच्या भावना दुखावल्या आहेत. या पार्श्वभूमीवर शिवसेना जिल्हाप्रमुख संजय चौगुले यांनी पक्षप्रमुख उद्धव ठाकरे यांना निवेदन सादर करून या प्रकरणात पक्षाची सर्व ताकद उभी करण्याची मागणी केली आहे.

या संस्थेने न्यायालयात दिलेली माहिती ही अपूर्ण आणि दिशाभूल करणारी आहे. माधुरी हत्तीण ही केवळ प्राणी नसून, लाखो लोकांच्या श्रद्धेचा, परंपरेचा आणि अध्यात्मिक नात्याचा भाग आहे. तिचे स्थानांतर ही फक्त कायदेशीर बाब नसून भावनिक वेदनेचा विषय आहे. असे निवेदनात म्हटले आहे.

या अगोदरही कोल्हापूरच्या श्रीक्षेत्र ज्योतिबा डोंगरावरील ‘सुंदर’ नावाचा हत्ती नेण्यात आला होता आणि आता शेडबाळ मंदिरालाही हत्तीसंदर्भात नोटीस आल्याचे समजते. या घटनांची साखळी सुरू राहिल्यास पश्चिम महाराष्ट्रातील मठ-मंदिरांची परंपरा धोक्यात येईल, असे मत जिल्हाप्रमुख संजय चौगुले यांनी व्यक्त केले.

यावेळी खासदार विनायक राऊत, आमदार सुनील प्रभू , जिल्हासंपर्कप्रमुख अरुणभाई दुधवडकर, सहकारी जिल्हाप्रमुख वैभव उगळे, रविकिरण इंगवले, प्रा. सुनील शिंत्रे आदी उपस्थित होते.