इचलकरंजी / महान कार्य वृत्तसेवा
इचलकरंजी येथील गावभाग परिसरातील डॉ.सुषमा पुजारी (सिद) यांना अहिल्यादेवी सामाजिक व शैक्षणिक ट्रस्ट आणि ऑल इंडिया धनगर समाज महासंघ यांच्या संयुक्त विद्यमाने
अहिल्यारत्न पुरस्काराने सन्मानित करण्यात आले. अहिल्यादेवी होळकर यांच्या ञिशताब्दी जयंतीनिमित्त कराड येथील स्व.यशवंतराव चव्हाण सभागृहात झालेल्या एका शानदार सोहळ्यात हा पुरस्कार आमदार रामहरी रुपनवर यांच्या हस्ते तसेच प्रमुख पाहुणे श्रीमंत योगीराज गायकवाड ,
साताऱ्याचे माजी नगरसेवक, अशोकराव शेडगे, पुण्याचे उद्योगपती हनुमंतराव दुधाळ, मोटार वाहन निरीक्षक सौरभ दडस, मलकापूरचे माजी नगराध्यक्ष आबासाहेब गावडे यांच्यासह विविध मान्यवरांच्या प्रमुख उपस्थितीत हा पुरस्कार प्रदान करण्यात आला.
डॉ. सुषमा पुजारी (सिद) यांनी सामाजिक बांधिलकीचे भान ठेवून वैद्यकीय क्षेत्राच्या माध्यमातून माफक दरात रुग्णांवर उपचार करणे, मोफत आरोग्य तपासणी शिबिर आयोजित गरजू रुग्णांना विविध आजारांवरील उपचाराचा लाभ मिळवून देण्याचा सातत्याने प्रयत्न सुरु ठेवला आहे. तसेच समाजातील गरजूंना विविध माध्यमातून मदत मिळवून देण्यात त्या कायमच अग्रेसर असतात. त्यांच्या या उल्लेखनीय कार्याची दखल घेऊनच त्यांची अहिल्या रत्न पुरस्कारासाठी निवड करण्यात आली होती.
या पुरस्कार वितरण सोहळ्यास माजी नगरसेवक विजय वाटेगावकर, शंकरराव वीरकर, कराड मार्केट कमिटीचे उपसभापती संभाजी काकडे, सद्गुरू श्री साखर कारखान्याचे चेअरमन बाळासाहेब पाटील, शिक्षक संघाचे राष्ट्रीय कार्यकारी अध्यक्ष बळवंतराव पाटील, अहिल्यादेवी ट्रस्टचे अध्यक्ष प्रवीण काकडे, उद्योगपती बाळासाहेब खरात, स्वामी विवेकानंद शिक्षण संस्थेचे सदस्य उत्तमराव गलांडे यांच्यासह विविध क्षेत्रातील मान्यवर, नागरिक मोठ्या संख्येने उपस्थित होते. या पुरस्काराबद्दल त्यांचे विविध स्तरांतून अभिनंदन होत आहे.