क्लिनर जागीच ठार, तर २० हून अधिक जखमी, ३ जणांची प्रकृती गंभीर
पुलाची शिरोली / महान कार्य वृत्तसेवा
पुणे बेंगलोर राष्ट्रीय महामार्गावर शिरोली औद्योगिक वसाहतीतील एच एम फाट्याला मेनन पिस्टन कंपनीसमोर ट्रॅव्हल्स, कंटेनर व इको गाडीचा भीषण अपघात आज सकाळी ७.३० च्या सुमारास घडला आहे.
याबाबत घटनास्थळावरून मिळालेली माहिती अशी की एम एच ४६ ए आर ५१८२ क्रमांकाचा श्री रोडवेज चा कंटेनर घेऊन चालक शैलेश यादव (रा.उत्तरप्रदेश) मुंबईहून बेंगलोरला चालला होता. आज शनिवारी सकाळी ७.३० च्या सुमारास कंटेनर शिरोली औद्योगिक वसाहतीतील एचएमटी फाट्याजवळ आला असता गाडीत बिघाड झाल्याने गाडीचा वेग कमी करून बाजूला घेत होता. तितक्यात या कंटेंनर च्या पाठोपाठ पुणे वरून बेळगांवकडे नाकोडा कंपनीची एम एच ०९ जी जे ६७५९ या क्रमांकाची ट्रॅव्हल्स घेऊन चालक संदीप शंकरराव चांगभले (रा.निपाणी) हा निघाला होता. समोरच्या कंटेनरचा अंदाज न आल्याने कंटेनरला जोराची धडक दिली. धडक इतकी जोरात होती की, कंटेनरचा ५ ते ७ फूट भाग ट्रॅव्हल्स मध्ये क्लिनर कडील बाजूस घुसला. यामध्ये क्लिनर रोहन कुलकर्णी (रा.खडकलाट,निपाणी) हा जागीच ठार झाला आहे. तसेच चालक ट्रॅव्हल्स मधून उडून रस्त्यावर १० फुटांवर पडला होता. तसेच या ट्रॅव्हल्सच्या पाठोपाठ येणाऱ्या एम एच ५० यु ३७६५ या क्रमांकाच्या इको गाडीने ट्रॅव्हल्सला जोराची धडक दिली. ही एक गाडी पेशंट घेऊन पाटणहून कोल्हापूर चालली होती असे समजते. या इको गाडीच्या एअरबॅग्ज उघडल्याने यातील प्रवासी वाचले.
या तिहेरी भीषण अपघातानंतर ट्रॅव्हल्स मधील झोपेतून जागे झाल्यानंतर जिवाच्या आकांताने जोरदार आरडाओरडा केला. या अपघातात वीसहून अधिक जखमी झाले आहेत. यातील तिघा जणांची प्रकृती गंभीर असल्याचे समजते. सर्व जखमी बेळगाव व चंदगड भागातील आहेत.
घटना समजल्यानंतर शिरोली एमआयडीसी पोलिसांनी व स्थानिक नागरिकांनी, वाहनधारकांनी घटनास्थळी धाव घेऊन प्रवाशांना संकटकाळी दरवाजातून बाहेर काढले. घटनास्थळी ५ ते ६ रुग्णवाहिका बोलावून किरकोळ जखमींना शिरोली प्राथमिक आरोग्य केंद्रात दाखल केले, तर गंभीर जखमींना कोल्हापूर येथील सीपीआर तसेच खाजगी रुग्णालयात उपचारासाठी दाखल केले. घटनास्थळावरचे दृश्य अंगावर शहारे आणणारे होते. ट्रॅव्हल्स मधून जखमी प्रवाशांना बाहेर काढताना मोठी कसरत करावी लागली. या घटनेनंतर ट्रॅव्हल्स मधील वयस्कर नागरिक, युवती भयभीत झाल्या होत्या.अपघातानंतर सुमारे एक तासभर वाहनांच्या लांबच लांब रांगा लागल्या होत्या. त्यामुळे वाहतुकीची मोठी कोंडी झाली होती.
जखमींची नावे पुढीलप्रमाणे-
महेश पाटील (रा.कार्वे,चंदगड), संजय तेजम रा.चंदगड, प्रवीण केंबावी (रा.पुणे), किरण पाटील, राजन गुरव, गौरंग जाधव, प्रवीण जाधव, अमोल देसाई, उत्कर्ष भसणे, जयवंत शिंटे, देवराज मोरे, नारायण वटवेकर, ऐश्वर्या गुंडकल, सोनाली मोरे, साहिल देसाई, स्नेहल डोंगळे, रितू हावळ अशी जखमींची नावे आहेत. जखमींची संख्या अधिक असण्याची शक्यता आहे. या घटनेची नोंद शिरोली एमआयडीसी पोलीस ठाण्यात झाली आहे.