हवाई दलाच्या जवानाच्या वेशात फसवणूक करणाऱ्या व्यक्तीला पुण्यात अटक

पुणे / महान कार्य वृत्तसेवा

दक्षिणी कमांड मिलिटरी इंटेलिजन्स पुणे आणि पुणे शहराच्या खराडी पोलीस ठाण्याच्या संयुक्त कारवाईत हवाई दलाच्या जवानाच्या वेशात फसवणूक करणाऱ्या एका व्यक्तीला अटक करण्यात आलीय. गौरव कुमार असं अटक करण्यात आलेल्या आरोपीचे नाव असून, पुणे पोलिसांनी आरोपीवर भारतीय दंड संहिता  च्या कलम 168 अंतर्गत खराडी पोलीस ठाण्यात गुन्हा दाखल केलाय. पुणे पोलिसांच्या माहितीनुसार, आरोपी गौरव कुमार याच्या संशयास्पद हालचालींबाबत गोपनीय माहिती मिळाल्यानंतर त्याची तपासणी करीत त्याला अटक करण्यात आलीय.

खोटी माहिती सांगत नागरिकांची दिशाभूल : याबाबत अधिक माहिती अशी की, आरोपी गौरव कुमार याच्या संशयास्पद हालचालींबाबत गोपनीय माहिती मिळाली की आरोपी हा सोशल मीडियावर हवाई दलाच्या जवानाच्या वेशातील कपडे घालून आपली खोटी माहिती सांगत नागरिकांची दिशाभूल करीत आहे. ही माहिती मिळताच तत्काळ खराडी पोलिसांचं पथक आणि दक्षिणी कमांड मिलिटरी इंटेलिजन्स पथकाने सापळा रचत 18 मे रोजी रात्रीच्या सुमारास पुणे शहरातील खराडी परिसरात आरोपीला ताब्यात घेतले.

फसवणुकीसाठी वापरले गेलेले काही साहित्य जप्त : तसेच आरोपीचा अधिक तपास करीत फसवणुकीसाठी वापरले गेलेले काही साहित्य जप्त करण्यात आले, ज्यामध्ये दोन हवाई दलाचे टी-शर्ट, एक हवाई दलाचा कॉम्बॅट पँट, एक जोडी हवाई दलाचे कॉम्बॅट शूज, दोन हवाई दलाचे बॅजेस, एक ट्रॅक सूट समाविष्ट आहे, अशी माहिती पुणे पोलिसांनी दिली. सध्या आरोपीची चौकशी सुरू असून, त्याच्या कृत्यामागील हेतू आणि संभाव्य सुरक्षेशी संबंधित परिणाम तपासले जात आहेत.