पुणे / महान कार्य वृत्तसेवा
पुण्यात देवाच्या दारातच सोनसाखळी चोरांची टोळी सक्रीय असल्याचं समोर आलं आहे. पुण्यातील दगडूशेठ हलवाई गणपती मंदिराच्या परिसरात हा प्रकार सुरु होता. पोलिसांनी याप्रकरणी दोन महिलांना अटक केली आहे. दोन्ही महिला आरोपींची ओळख पोलिसांनी पटवली असून त्यांची नावं माधुरी संतोष डुकळे (घाडगे) (वय 23) आणि काव्या तनवीर जाधव (वय 21) अशी आहेत. पोलिसांनी दिलेल्या माहितीनुसार, दोघीही पुण्यातील यवत गावच्या रहिवासी आहेत. महिलेने रविवारी विश्रामबाग पोलीस ठाण्यात तक्रार दाखल केल्यानंतर कारवाई करण्यात आली.
पोलिसांनी दिलेल्या माहितीनुसार, रविवारी दुपारी 3 वाजण्याच्या सुमारास तक्रारदार महिला आपल्या लहान मुलीला घेऊन श्रीमंत दगडूशेठ हलवाई गपणती मंदिरात दर्शनासाठी आली होती. मंदिरात जाण्यासाठी त्या रांगेत उभ्या असताना दोन्ही आरोपी महिलांनी भक्त असल्याचं भासवत मुलीच्या गळ्यातील सोनसाखळी खेचली. या साखळीची किंमत 40 हजार आहे. मुलीच्या गळ्यातील सोनसाखळी चोरल्याचं लक्षात येताच महिलेने मदत मागत आरडाओरड सुरु केली. यादरम्यान तिथे उपस्थित लोकांनी आरोपी महिलांना ओळखलं आणि पकडलं. यानंतर दोन्ही महिलांना सुरक्षारक्षकांच्या ताब्यात देण्यात आलं. चोरीची माहिती पोलीसही घटनास्थळी दाखल झाले. यानंतर दोन्ही महिलांना कलम 303 (2) अंतर्गत अटक करण्यात आली.
हवालदार गणेश काटे या प्रकरणाचा तपास करत आहेत. त्यांनी दिलेल्या माहितीनुसार, ”चोरलेली सोनसाखळी दोन्ही आरोपी महिलांकडून मिळवण्यात आली आहे. कोर्टात हजर करण्यात आलं असता, त्यांच्या चौकशीसाठी एक दिवसाची कोठडी सुनावण्यात आली आहे”.
छत्रपती शिवाजी महाराज रस्त्यावरील श्रीमंत दगडूशेठ हलवाई गणपती मंदिर हे पुण्यातील सर्वात प्रतिष्ठीत गणपती मंदिरांपैकी एक आहे. येथे दररोज भाविकांची मोठी गर्दी असते. रविवार आणि सुट्टीच्या दिवशी भाविकांच्या संख्येत प्रचंड वाढ होते. अनेक मोठे राजकारणी आणि चित्रपट कलाकारदेखील येथे दर्शनासाठी आणि प्रार्थनेसाठी येत असतात.