इचलकरंजी / महान कार्य वृत्तसेवा (सुभाष भस्मे)
इचलकरंजी शहर आणि परिसरात आकर्षणाचे केंद्रबिंदु ठरलेल्या आणि आपल्या वेगळ्या उपक्रमाने प्रसिद्धीस आलेल्या कलानगरचा महागणपती मंडळाने यावर्षी १ हजार लहान-मोठ्या हत्तींची प्रतिकृती असलेला गजमहाल साकारला आहे. चंदुर रस्त्यावर असणार्या या मंडळाने ६ हजार चौरस फुटांमध्ये हा महल उभा केला असून गणेशोत्सवात विविध धार्मिक आणि सामाजिक कार्यक्रमांचे आयोजन करण्यात आले असल्याची माहिती मंडळाच्यावतीने पत्रकार परिषदेत दिली.
गेल्या काही वर्षांपासून कलानगरचा महागणपती प्रसिद्धीच्या झोतात आला आहे. धार्मिक आणि सामाजिक उपक्रम राबवत या मंडळाने आपली वेगळी ओळख निर्माण केली आहे. यावर्षी देखील मंडळाने आकर्षक गजमहाल उभारला आहे. ६० बाय ९६ इतक्या भव्य आकारात उभारलेला हा गजमहाल इचलकरंजी आणि पंचक्रोषीतील नागरीकांचे आकर्षण ठरणार आहे. एप्रिल महिन्यापासून या महालाचे काम सुरु असून या ठिकाणी सर्व कामे मंडळाचे कार्यकर्ते करतात असे सांगण्यात आले.
महालाच्या डिझाईनपासून रंगरंगोटीपर्यंत ते गणेशमुर्तीच्या सजावटीपर्यंत स्वत: कार्यकर्ते आपला हातभाल लावतात. २८ ऑगस्ट ते ५ सप्टेंबर अखेर आयोजित कार्यक्रमात सामुहिक गणपती अर्थवशीर्ष पठण, दररोज वेगवेगळ्या रुपात पुजा बांधून महाआरती, गणेशयाग, वारकरी भजन, उत्सवमुर्तीचा भागातून पालखी सोहळा त्याचबरोबर गीतगायन, नृत्याचे कार्यक्रम राबवण्यात आले आहेत. हवा आणि आवाजाच्या प्रदुषणाला छेद देत सामाजिक बांधिलकी जपत या मंडळाने आपली वाटचाल सुरु ठेवली आहे. विसर्जनाची मिरवणुक देखील अत्यंत आगळ्यावेगळ्या स्वरुपात काढण्यात येणार असल्याचे यावेळी सांगण्यात आले. यावेळी मंडळाचे अध्यक्ष सचिन तोडकर, प्रशांत सपाटे, सुनिल तोडकर, अभिषेक वाळवेकर, रमाकांत वाळवेकर यांच्यासह मंडळाचे पदाधिकारी, कार्यकर्ते उपस्थित होते.