मोदींच्या हस्ते तीन वंदे भारत एक्सप्रेसचे उद्धाटन

बंगळुरू / महान कार्य वृत्तसेवा

पंतप्रधान नरेंद्र मोदी यांनी बंगळुरू येथे एका विशेष समारंभात तीन वंदे भारत एक्सप्रेसना हिरवा झेंडा दाखवला. मोदींनी केएसआर बंगळुरू ते बेळगाव वंदे भारत एक्स्प्रेसला बंगळुरू रेल्वे स्थानकावर हिरवा झेंडा दाखवला. यानंतर पंतप्रधान मोदींनी श्री माता वैष्णोदेवी कटरा ते अमृतसर वंदे भारत एक्स्प्रेस आणि नागपूर (अजनी) ते पुणे वंदे भारत एक्स्प्रेस या दोन गाड्यांना ऑनलाईन पद्धतीने (व्हिडीओ कॉन्फरन्स) हिरवा झेंडा दाखवला. या व्यतिरिक्त पंतप्रधानांनी बंगळुरूच्या बहुप्रतिक्षित येलो मेट्रो लाईनलाही हिरवा झेंडा दाखवला.

केएसआर बंगळुरू ते बेळगाव वंदे भारत एक्स्प्रेस बंगळुरू, धारवाड, हुबळी, हावेरी, दावणगेरे, तुमकूर, यशवंतपूर आणि बेळगाव येथे थांबणार आहे. तर श्री माता वैष्णोदेवी कटरा ते अमृतसर वंदे भारत एक्स्प्रेस कटरा, जम्मू तावी, पठाणकोट केंट, जालंधर सिटी, बियास आणि अमृतसर येथे थांबणार आहे. नागपूर (अजनी) ते पुणे वंदे भारत एक्स्प्रेस ही वंदे भारत मार्गातील 881 किलोमीटरची सर्वात लांब ट्रेन आहे. वर्धा, बडनेरा, अकोला, शेगाव, भुसावळ, जळगाव, मनमाड, कोपरगाव, अहमदनगर, दौंड, पुणे ही या गाडीच्या मार्गावरील महत्त्वाची स्थानके आहेत.

या वंदे भारत गाड्या आठवड्यातून 6 दिवस धावतील, त्यामध्ये 7 चेअर कार + 1 एक्झिक्युटिव्ह चेअर कारसह एकूण 590 जागा असतील. या गाड्यांसाठी इकॉनॉमी श्रेणीच्या तिकिटांची सुरुवात 1500 रुपयांपासून होईल. महत्त्वाचे म्हणजे या गाड्यांचा सरासरी वेग ताशी 73 किमी असेल.

बंगळुरू येलो मेट्रो लाईनवर 16 स्थानके

बंगळुरू येलो मेट्रो लाईन ही 19.15 किमी लांबीची आहे. यात 16 स्थानके आहेत. आरव्ही रोड, रागी गुड्डा, जयदेवा हॉस्पिटल, बीटीएम लेआउट, सेंट्रल सिल्क बोर्ड, बोम्मना हल्ली, होंगरा सँड्रा, कुडलू गेट, सिंगा सँड्रा, होसा रोड, बेरेटा अग्रहारा, इलेक्ट्रॉनिक सिटी, इन्फोसिस फाउंडेशन कोनाप्पाना अग्रहारा, हुस्कुर रोड, हेब्बा गोडी आणि बोम्मासंद्रा येथे मेट्रो थांबणार आहे.

नागपूर (अजनी) ते पुणे वंदे भारत एक्स्प्रेसची वैशिष्ट्ये नागपूर (अजनी) ते पुणे वंदे भारत एक्स्प्रेस ही सेमी-हायस्पीड एसी चेअर कार सेवा आहे. नवीन वंदे भारत एक्सप्रेस अजनी (नागपूर) येथून सकाळी 9.50 वाजता सुटेल आणि रात्री 9.50 वाजता पुण्याला पोहोचेल. आठवड्यातून सहा दिवस ही सेवा सुरू राहील. सोमवारी नागपूरहून ट्रेन चालणार नाही. पुण्याहून ही ट्रेन सकाळी 6.25 वाजता सुटून, संध्याकाळी 6.25 वाजता अजनीला पोहोचेल. नागपूर (अजनी) ते पुणे वंदे भारत एक्स्प्रेस ही वंदे भारत मार्गातील 881 किलोमीटरची सर्वात लांब ट्रेन आहे. वर्धा, बडनेरा, अकोला, शेगाव, भुसावळ, जळगाव, मनमाड, कोपरगाव, अहमदनगर, दौंड, पुणे ही या गाडीच्या मार्गावरील महत्त्वाची स्थानके आहेत. या गाडीचे एसी चेअर कारचे भाडे 1500 रुपयांपासून सुरू होईल तर एसी एक्झिक्युटिव्ह चेअर कारचे भाडे 3500 रुपयांपासून सुरू होईल. या गाडीची सेवा 14 ऑगस्टपासून नियमित सुरू होईल.