मुंबई / महान कार्य वृत्तसेवा
शनिवारी मध्यरात्री पुणे पोलिसांनी खराडी परिसरात छापेमारी करत रेव्ह पार्टीचा पर्दाफाश केला आहे. एका उच्चभ्रू परिसरातील एका फ्लॅटमध्ये ही पार्टी सुरू होती. पोलिसांनी मध्यरात्री छापेमारी करत माजी मंत्री एकनाथ खडसे यांचे जावई प्रांजल खेवलकर यांच्यासह इतर सहा जणांना ताब्यात घेतलं आहे. यामध्ये दोन तरुणींचा देखील समावेश आहे. छापेमारीत पोलिसांना घटनास्थळी मोठ्या प्रमाणात अमली पदार्थ, हुक्का साहित्य आणि मद्य आढळल्याची माहिती मिळाली आहे.
पण खरंच या पार्टीत अमली पदार्थांचा वापर झाला का? एकनाथ खडसे यांच्या जावयाने ड्रग्ज घेतले का? असे अनेक प्रश्न अनुत्तरित आहेत. पोलिसांनी सात आरोपींना ताब्यात घेतल्यानंतर सातही जणांची वैद्यकीय चाचणी केली आहे. या चाचणीचा आता अहवाल समोर आला आहे. ज्यात सातपैकी दोघांच्या रक्तात अल्कोहोल अर्थात दारुची मात्रा आढळली आहे. मात्र सातपैकी कुणीही ड्रग्जचं सेवन केल्याचं प्राथमिक अहवालात नमूद करण्यात आलं नाही. त्यामुळे ही खरंच रेव्ह पार्टी होती की मद्य पार्टी? याबाबत संशय निर्माण होताना दिसत आहे.
शनिवारी रात्री उशिरा पुणे पोलिसांच्या गुन्हे शाखेनं खराडी परिसरातील उच्चभ्रू परिसरात छापेमारी केली होती. या पार्टीच्या ठिकाणावरून पोलिसांनी सात जणांना ताब्यात घेतलं होतं. आता या सातही जणांची वैद्यकीय तपासणी पूर्ण झाली आहे. वैद्यकीय तपासणीच्या प्राथमिक अहवालात 7 पैकी 2 जणांनी अल्कोहोलच सेवन केल्याची माहिती समोर आहे. आता सर्वांचे रक्ताचे आणि लघवीचे नमुने तपासणीसाठी पाठवण्यात आले आहेत.
मध्यरात्री काय घडलं?
पुण्यातील खराडी परिसरातील एका उच्चभ्रू सोसायटीत रेव्ह पार्टी सुरू असल्याची गुप्त माहिती पोलिसांना मिळाली होती. या माहितीच्या आधारे पोलिसांनी संबंधित ठिकाणी रात्री उशिरा छापेमारी केली. यावेळी तिथे रेव्ह पार्टी सुरू असल्याचं पोलिसांच्या निदर्शनास आलं. घटनास्थळी मोठ्या प्रमाणात अमली पदार्थ, मद्य आणि हुक्काचं सेवन केल्याचं पोलीस छापेमारीत समोर आलं. हा सगळा प्रकार खराडी भागातील एका फ्लॅटमध्ये सुरू होता. हाउस पार्टीच्या नावाखाली ही पार्टी सुरू होती. ज्या रुममध्ये ही पार्टी झाली, ती रुमही खडसे यांचे जावई प्रांजल खेवलकर यांच्या नावावर बूक करण्यात आल्याची माहिती समोर आली आहे. या संपूर्ण घटनेचा तपास पोलीस करत आहेत.