कोलंबो / महान कार्य वृत्तसेवा
अलीकडेच बांगलादेश आणि श्रीलंका क्रिकेट संघात तीन सामन्यांची टी-20 मालिका खेळवण्यात आली. या मालिकेत बांगलादेशनं श्रीलंकेला 2-1 असं हरवून इतिहास रचला आहे. टी-20 आंतरराष्ट्रीय क्रिकेटच्या इतिहासात पहिल्यांदाच बांगलादेशनं श्रीलंकेला मालिकेत पराभूत केलं आहे. तिसऱ्या टी-20 सामन्याबद्दल बोलायचं झालं तर, प्रथम फलंदाजी करताना श्रीलंकेनं 7 विकेट्स गमावून 132 धावा केल्या. बांगलादेशनं हे लक्ष्य 16.3 षटकांत 2 गडी गमावून पूर्ण केलं.
श्रीलंकेचे फलंदाज अपयशी : या सामन्यात श्रीलंकेचा कर्णधार चारिथ असलंका यानं नाणेफेक जिंकून फलंदाजीचा निर्णय घेतला, जो संघासाठी पूर्णपणे चुकीचा ठरला. नाणेफेक जिंकून प्रथम फलंदाजी करण्याचा निर्णय घेणाऱ्या श्रीलंकेची सुरुवात चांगली झाली नाही; पहिल्या षटकाच्या शेवटच्या चेंडूवर कुसल मेंडिसच्या रुपात त्यांनी आपला पहिला बळी गमावला. सलामीवीर पथुम निस्सांकानं संघासाठी सर्वात मोठी खेळी खेळली, त्यानं 39 चेंडूत 4 चौकारांसह 46 धावा केल्या. याशिवाय सातव्या क्रमांकावर फलंदाजीला आलेल्या दासुन शनाकानं चांगली खेळी केली. त्यानं 25 चेंडूत 4 चौकार आणि 2 षटकारांसह नाबाद 35 धावा केल्या. संघाचे सहा फलंदाज दुहेरी अंकही ओलांडू शकले नाहीत. या कारणास्तव संघाला शेवटी मोठी धावसंख्या उभारता आली नाही. या सामन्यात बांगलादेशचा सर्वात यशस्वी गोलंदाज मेहदी हसन मिराज होता, त्यानं 4 षटकांत 11 धावा देत 4 बळी घेतले.
बांगलादेशकडून तन्जीद हसनची शानदार खेळी : 133 धावांच्या लक्ष्याचा पाठलाग करताना बांगलादेशची सुरुवात खूपच खराब झाली. पहिल्याच चेंडूवर संघानं पहिली विकेट गमावली. परवेझ हसन इमॉन खातं न उघडताच एलबीडब्ल्यू झाला. त्यानंतर तन्जीद हसन तमीमनं कर्णधार लिटन दाससोबत 50 चेंडूत 74 धावांची भागीदारी केली आणि या भागीदारीनं बांगलादेशच्या विजयाचा पाया रचला. लिटन 32 धावा करुन बाद झाला. चौथ्या क्रमांकावर खेळणाऱ्या तौहीद हृदयॉयनं 27 धावा केल्या. त्याच्यासोबत, तन्जीद हसन तमीमनं शानदार अर्धशतकी खेळी केली, तो 73 धावा काढून नाबाद राहिला आणि 16.3 षटकांत संघाला विजय मिळवून दिला. श्रीलंकेकडून कामिंडू मेंडिस आणि नुवान तुषारा यांनी प्रत्येकी 1 बळी घेतला.