पुणे / महान कार्य वृत्तसेवा
हिंजवडी आयटी पार्क, माण आणि मारुंजी परिसरातील वाहतूक कोंडी आणि इतर अनधिकृत बांधकामांची पाहणी करण्यासाठी उपमुख्यमंत्री अजित पवार रविवारी सकाळी सहा वाजता हिंजवडी परिसरात दाखल झाले. अजित पवार यांनी हिंजवडी फेज वन, फेज टू आणि फेज थी या ठिकाणी पाहणी केली.
उपमुख्यमंत्री अजित पवार ऑन ॲक्शन मोड : रविवारी सकाळी सहा वाजल्यापासून राज्याचे उपमुख्यमंत्री अजित पवार हिंजवडी आयटी पार्कमधील विविध समस्या सोडवण्यासाठी दौऱ्यावर आहेत. हिंजवडीतील रस्ता आणि वाहतूक कोंडीच्या समस्या सोडवण्यासाठी आता स्वत: उपमुख्यमंत्री अजित पवारच रस्त्यावर उतरले आहेत. यावेळी पीएमआरडीए अधिकाऱ्यांना स्पष्ट सूचना देत अधिकाऱ्यांना त्यांनी सांगितलं की ”आता कोणाचंही ऐकू नका, सरकारी रस्ता अडवणाऱ्या व्यक्तींवर सरकारी कामात अडथळा आणल्या प्रकरणी 353 कलमानुसार गुन्हे दाखल करा. रस्त्याला विरोध करणाऱ्या स्थानिकांना मोबदला देण्यात येईल,” असं अजित पवारांनी सांगितलं आहे. ”तर वाहतूक कोंडीच्या प्रश्नांच्या समस्येवर तत्काळ निधी पाहिजे तेवढा प्राप्त करून देऊ. अरुंद झालेल्या रस्त्याची कामं पूर्णत्वास नेण्यात येतील,” असं आश्वासन देखील उपमुख्यमंत्री अजित पवार यांनी दिलं .
हिंजवडीतील समस्यांविषयी घेणार महत्वाची बैठक : क्रोमा चौकात मेट्रोच्या ढिसाळ कारभारामुळं त्या ठिकाणचा रस्ता अरुंद झालाय. त्यामुळं सरकता जिना बाजूला घेऊन पुन्हा तो रस्ता मोकळा करण्याबाबत अभियंत्यांना उपमुख्यमंत्री अजित पवार यांना विनंती केली. यावर अजित पवार यांनी पीएमआरडीए आणि मेट्रो प्रशासनाला योग्य मार्ग काढण्याचे आदेश दिले आहेत. यासह अजित पवार पीएमआरडीएच्या कार्यालयात हिंजवडीतील समस्यांविषयी महत्त्वाची बैठक घेणार आहेत.