उद्धव ठाकरेंनी हिंदीचा शासन निर्णय टराटरा फाडला, हिंदी विरोधात शिवसैनिक एकवटले, रस्त्यावरची लढाई सुरू

मुंबई / महान कार्य वृत्तसेवा

हिंदीच्या शासन निर्णयाविरोधात सर्व विरोधी पक्ष एकवटल्याचं दिसून येतंय. हिंदी सक्तीच्या शासन निर्णयाविरोधात शिवसेना उद्धव बाळासाहेब ठाकरे पक्ष राज्यभर आंदोलन करत आहे. मुंबई मराठी पत्रकार संघ कार्यालय परिसरात उद्धव ठाकरेंच्या उपस्थितीत शासन निर्णयाची प्रतिकात्मक होळी करण्यात आली. या आंदोलनात काँग्रेसचे प्रदेशाध्यक्ष हर्षवर्धन सपकाळ यांच्यासह अन्य विरोधी पक्षही सहभागी झाल्याचं दिसून आलं. तसेच काही मराठी कलाकारही या आंदोलनात सहभागी झाले.

राज्य शासनाने राष्ट्रीय शिक्षण धोरण अंतर्गत बदल करून इयत्ता पहिली ते पाचवीच्या विद्यार्थ्यांना हिंदी सक्ती करण्याचा निर्णय घेतला आहे. या निर्णयाच्या विरोधात मनसे आणि शिवसेना ठाकरे गटाने मुंबईत 5 जुलै रोजी मोर्चाचे आयोजन केले आहे. यापूर्वी राज्यभरामध्ये तालुकास्तरावर हिंदी सक्तीच्या जीआरची होळी करत निषेध व्यक्त करण्यात आला.

हिंदीच्या मुद्द्यावर मराठी अभ्यास केंद्र आणि समविचारी संस्थाची मुंबईत बैठक पार पडली. त्यानंतर शासनाच्या जीआरची होळी करण्याचा निर्णय घेण्यात आला. त्यामध्ये ठाकरेंचे शिवसैनिक, तसेच महाविकास आघाडीचे नेते आणि कार्यकर्ते मोठ्या प्रमाणात उपस्थित होते.

 दादर परिसरात बॅनरबाजी

दरम्यान ठाकरेंच्या शिवसेनेकडून दादरच्या शिवसेना भवन परिसरात बॅनर लावण्यात आले आहेत. ‘हिंदीसक्तीच्या सरकार निर्णयाची होळी करूया, मराठी माणसाच्या एकजुटीची ताकद दाखवूया’ असा मजकूर बॅनरवर लिहिला आहे.

संजय राऊत यांनी प्रतिक्रिया दिली. ते म्हणाले की, ”मुंबईत होणाऱ्या या आंदोलनासाठी सगळ्यांना आमंत्रित करण्यात आलं होतं. याचा पहिला टप्पा होता तो शासन निर्णयाची होळी करणे. देवेंद्र फडणवीस, अजित पवार, एकनाथ शिंदे यांच्या सरकारने जो हिंदी सक्तीचा आदेश काढला आहे त्याची होळी करण्यात येणार आहे. यात केवळ शिवसैनिक सामील नाही तर त्या त्या जिल्ह्यातील मराठी जनता, साहित्यिक, लेखक यांनाही आमंत्रित केला आहे. उद्या अधिवेशन आहे अधिवेशनात सुद्धा चर्चा मांडू.”

मनसेचं बैठकीचं सत्र

दरम्यान, 5 जुलैच्या मोर्चाच्या पार्श्‌‍वभूमीवर मनसेचं बैठकांचं सत्र सुरु आहे. मोर्चाच्या नियोजनासाठी मनसेची मुंबईतील दादरमधील मनसेच्या राजगड या कार्यालयात बैठक पार पडली. या बैठकीला मनसेचे मुंबई शहराध्यक्ष संदीप देशपांडे, नितीन सरदेसाई, यशवंत किल्लेदार उपस्थित होते. तर यानंतर दक्षिण मुंबई पदाधिकाऱ्यांची मुंबई मराठी पत्रकार संघात पार पडणार आहे. मनसेचे नेते बाळा नांदगावकर यांच्या अध्यक्षतेखाली बैठकीचे आयोजन करण्यात आलेलं आहे.

अजित पवारांचा वेगळा सूर

हिंदीच्या निर्णयाविरोधात राज ठाकरे आणि उद्धव ठाकरे 5 जुलैला मुंबईत एकत्र मोर्चा काढणार आहेत. या पार्श्‌‍वभूमीवर उपमुख्यमंत्री अजित पवारांनी मोठं वक्तव्य केलं आहे. हिंदीच्या मुद्द्यावर मोर्चाची वेळच येऊ नये, असा आमचा प्रयत्न असल्याचं अजित पवार म्हणाले. चर्चेतून चांगला मार्ग निघू शकतो असं देखील अजित पवार यांनी म्हटले.