तेहरान / महान कार्य वृत्तसेवा
इराणचे सर्वोच्च नेते अयातुल्ला अली खामेनी यांनी शनिवारी इसायलने केलेल्या हल्ल्याला प्रत्युत्तर देण्याचा इशारा दिला. इसायलने शुक्रवारी इराणच्या आण्विक आणि लष्करी तळांना लक्ष्य केले होते. त्यानंतर इराणनेही इसायलवर क्षेपणास्त्रांचा मारा केला. त्यानंतर खामेनी यांनी व्हिडीओच्या माध्यमातून इसायल आणि झायोनिस्ट राजवटीचा अंत जवळ आल्याचा इशारा दिला.
इराणचे सैन्य प्रत्युत्तर देण्यास सज्ज आहे, असे सांगताना खामेनी म्हणाले की, त्यांनी (इसायल) हल्ला केला आणि सर्व संपले असे समजू नका. उलट त्यांनीच पहिला हल्ला केला आणि संघर्षाची सुरुवात केली.
खामेनी यांच्या एक्स हँडलवरून त्यांचे सविस्तर निवेदन असलेला व्हिडीओ शेअर करण्यात आला आहे. झियोनिस्ट राजवटीने सर्वात मोठी चूक केली असून ती अतिशय गंभीर आहे. इसायलने केलेल्या हल्ल्यामुळे आता इसायली राजवटीचा विनाश जवळ आला आहे, असे खामेनी यावेळी म्हणाले.
झायोनिस्ट राजवटीने मोठी चूक केली. ईश्वराच्या कृपेने आता त्यांची राजवट उध्वस्त होईल. इराणी राष्ट्र आपल्या शहीदांचे रक्त सूड घेतल्याशिवाय वाया जाऊ देणार नाही. तसेच इराणच्या हवाई क्षेत्राच्या उल्लंघनाकडेही दुर्लक्ष करणार नाही. आमचे सशस्त्र दल तयार आहे. देशातील लोक सशस्त्र दलांच्या मागे आहेत, असेही खामेनी यावेळी म्हणाले.
शुक्रवारी रात्री आणि शनिवारी पहाटे इराणने इसायलवर क्षेपणास्त्र हल्ला केल्याने मध्य पूर्वेतील तणाव पुन्हा एकदा वाढला आहे. ऑपरेशन रायझिंग लायनला प्रत्युत्तर देण्यासाठी हे हल्ले करण्यात आले आहेत.
इराणने अणू कार्यक्रम पुढे नेण्याची कटिबद्धता वारंवार दर्शविल्यानंतर आणि या बाबतीत अमेरिकेच्या आवाहनालाही धुडकावून लावल्यानंतर इसायलने शुक्रवारी इराणच्या आण्विक आणि क्षेपणास्त्र तळांना लक्ष्य केले. इसायलच्या ‘ऑपरेशन रायझिंग लायन’मध्ये इराणच्या वरिष्ठ लष्करी अधिकाऱ्यांचा मृत्यू झाला. इराणने या हल्ल्याला ड्रोन हल्ल्याने तातडीने प्रत्युत्तर दिले आहे.
इराणकडून संभाव्य अणुबॉम्बचा धोका टाळण्यासाठी हल्ला केल्याचा दावा इसायलने केला आहे. इराणवर केलेल्या हल्ल्यात दोनशेहून अधिक लढाऊ विमानांचा समावेश होता. सुमारे शंभर लक्ष्यांवर हा हल्ला करण्यात आला.