मुंबा लोकल ट्रेन अपघाताच्या दुसऱ्याच दिवशी डोंबिवली स्थानकात भयावह दृश्य

एसी लोकलच्या दरवाजाला प्रवाशी लटकले

मुंबई / महान कार्य वृत्तसेवा

मध्य रेल्वेमार्गावरील मुंबा स्थानकाजवळ सोमवारी 13 प्रवासी चालत्या लोकल ट्रेनमधून खाली पडल्याची घटना घडली होती. या दुर्घटनेत चार प्रवाशांचा मृत्यू झाला होता तर नऊजण जखमी झाले होते. जखमींपैकी दोघांची प्रकृती गंभीर आहे. या घटनेनंतर मुंबईकरांकडून प्रचंड संताप व्यक्त करण्यात आला होता. मध्य रेल्वेच्या उशीरा धावणाऱ्या लोकल ट्रेन आणि कोलमडलेल्या नियोजनामुळे वारंवार निर्माण होणाऱ्या समस्यांचा मुद्दा ऐरणीवर आला होता. मात्र, या दुर्घटनेच्या दुसऱ्या दिवशी डोंबिवली रेल्वे स्थानकात भयंकर दृश्य दिसून आले. डोंबिवली स्थानकात एसी लोकल ट्रेनमध्ये चढण्यासाठी मंगळवारी प्रचंड गर्दी झाली होती. ही गर्दी इतकी होती की, प्रवासी लोकल ट्रेनप्रमाणे एसी ट्रेनच्या दरवाजात लटकले होते. त्यामुळे एसी लोकलचे दरवाजे बंद होत नव्हते. या सगळ्या गोंधळामुळे एसी लोकल बराचवेळ डोंबिवली स्थानकात थांबून होती. दारात लटकलेले प्रवासी काही केल्या खाली उतरायला तयार नव्हते. या सगळ्यामुळे मध्य रेल्वे मार्गावरील लोकल गाड्यांच्या अपुऱ्या संख्येचा मुद्दा पुन्हा एकदा ऐरणीवर आला आहे.

दिवा, डोंबिवली, कळवा या रेल्वे स्थानकांमध्ये कर्जत आणि कल्याणहून येणाऱ्या अप मार्गावरील लोकल ट्रेन भरुन येतात. त्यामुळे दिवा स्थानकातील प्रवाशांना ट्रेनमध्ये जागा नसते. मात्र, सकाळच्या वेळेत कार्यालय गाठणे गरजेचे असल्याने दिवा स्थानकातील प्रवासी लोकल ट्रेनच्या फुटबोर्डवर जागा मिळाली तरी ट्रेनमध्ये चढतात. त्यामुळे दिवा स्थानकात ट्रेनला प्रचंड गर्दी होते. यामुळे अनेकदा अपघात होता. सोमवारी झालेला अपघात हे त्याचे ताजे उदाहरण. मात्र, त्यानंतरही मध्य रेल्वे प्रशासनाला जाग आलेली दिसत नाही. कारण मंगळवारी एसी लोकल ट्रेनमधील गर्दी आवरण्यासाठी स्थानकात रेल्वे पोलीस किंवा मध्य रेल्वेचे कर्मचारी यापैकी कोणीही उपस्थित नव्हते.

हार्बर रेल्वे मार्गावरील वाहतूक विस्कळीत

हार्बर रेल्वेमार्गावरील वाहतूक मंगळवारी सकाळी विस्कळीत झाली. नेरुळ स्थानकात ओव्हरहेड वायर तुटल्याने या मार्गावरील वाहतूक ठप्प झाली होती. तब्बल दोन तासांनी रेल्वेकडून हा बिघाड दुरुस्त करण्यात आला. मात्र, दरम्यानच्या काळात लोकल ट्रेनचे वेळापत्रक कोलमडल्याने कामावर निघालेल्या कर्मचाऱ्यांना प्रचंड मनस्ताप सहन करावा लागला. अजूनही हार्बर मार्गावरील लोकल ट्रेन 20 ते 25 मिनिटे उशिराने धावत आहेत.