मुंबई / महान कार्य वृत्तसेवा
मुंबईच्या कांदिवली पूर्व परिसरात शिक्षकी पेशाला काळिमा फासणारी घटना उघडकीस आली आहे. इथं एका शिक्षकाने 15 वर्षीय विद्यार्थिनीचा वारंवार लैंगिक छळ केला आहे. आरोपीनं पीडित मुलीला दहावीच्या परीक्षेत नापास करण्याची धमकी देत, तिच्यावर वारंवार हात टाकला आहे. मागील अनेक दिवसांपासून पीडित मुलगी आरोपीचा छळ निमूटपणे सहन करत होती. पण पीडितेच्या आईला संशय आल्यानंतर हा धक्कादायक प्रकार उघडकीस आला. यानंतर समतानगर पोलीस ठाण्यात गुन्हा दाखल करण्यात आला आहे.
कुलदीप पांडे असं गुन्हा दाखल झालेल्या 38 वर्षीय नराधम शिक्षकाचं नाव आहे. तो कांदिवली पूर्वमधील हनुमान नगर येथील पाल राजेंद्र इंग्लिश हायस्कूलमध्ये गणित विषयाचा शिक्षक म्हणून काम करतो. पोलिसांनी आरोपी शिक्षक कुलदीप पांडे याला अटक केली आहे. त्याला न्यायालयात हजर केलं असता न्यायालयाने 4 सप्टेंबरपर्यंत पोलीस कोठडी सुनावली आहे.
नेमकं प्रकरण काय?
मिळालेल्या माहितीनुसार, आरोपी शिक्षक कुलदीप पांडे हा पाल राजेंद्र शाळेत गेल्या पंधरा ते वीस वर्षांपासून गणित विषय शिकवतो. पीडित मुलगी वय (15) ही दहावीत असून वर्गामध्ये शेवटच्या बेंचवर बसत असे. कुलदीप पांडे वारंवार या मुलीकडे जाऊन तिला स्पर्श करून तुला काही समजले की नाही, असे विचारत असे. समजले नाही तर मला परत विचार मी तुला सांगेन, असे म्हणून तिच्याशी अश्लील चाळे करत असे. तिने विरोध करूनही हा प्रकार सुरूच राहिला.
जुलै महिन्यापासून तर या शिक्षकाने घाणेरडे मेसेज पाठवणे सुरू केले. रात्री फोन करून रात्रीच्या वेळी भेटायला बोलवत असे. तू आली नाहीस, तर तुला दहावीमध्ये नापास करून टाकीन, असे धमकावत असे. दोन-चार दिवसाअगोदर या मुलीला भेटून तू कोणाला काही सांगितलं तर मी तुला ठार मारून टाकेन, असेही त्याने धमकावले.
मुलगी घाबरल्यासारखी दिसत असल्याने आईने विश्वासात घेऊन तिला विचारले आणि मुलीने सर्व हकिगत सांगितली. संतापलेल्या आईने मग शाळेत जाऊन कुलदीप पांडे याला दोन चापटा मारल्या. यानंतर शाळेनेही त्याच्याकडून लेखी जबाब घेऊन त्याला नोकरीवरून काढून टाकले. तरीही आरोपी शिक्षकाने मुलीचा छळ सुरूच ठेवला. शेवटी पीडित मुलीच्या आईने समता नगर पोलीस चौकी गाठली आणि तक्रार दिली. आरोपी कुलदीप पांडे याने अनेक विद्यार्थिनींचा असाच लैंगिक छळ केला असावा, असा संशयही आता उपस्थित होतोय.