सोलापूर / महान कार्य वृत्तसेवा
सोलापूर जिल्ह्यातील मंगळवेढ्यात एक धक्कादायक घटना समोर आली आहे. काही दिवसांपूर्वी इथं एका कडब्याच्या गंजीला आग लागली होती.त्यात एका महिलेचा जळालेल्या अवस्थेत मृतदेह सापडला. या प्रकरणी पोलिसांनी एका तरुणाला अटक केली होती. त्याच्यावर पत्नीला मारून तिचा मृतदेह जाळल्याचा आरोप केला होता. पण या प्रकरणात आता धक्कादायक ट्विस्ट आला आहे. ज्या महिलेला जाळून मारल्याचा आरोप करण्यात आला होता. ती महिला जिवंत आढळली आहे.
ही घटना मंगळवेढा येथील पाटकळ गावात ही घटना घडली. 14 जुलै रोजी पहाटे किरण नावाच्या महिलेने स्वत:ला पेटवून घेतल्याचा फोन तिच्या वडिलांना आला होते. किरणचे चुलत सासरे दत्तात्रेय सावंत यांनी हा फोन केला होता. हा फोन येताच किरणचे कुटुंब पाटकळला तातडीने पोहोचले. तेव्हा तिथे मोठी गर्दी होती. घरासमोर कडब्याची गंजी जळाली होती आणि त्यात एका महिलेचा मृतदेह पूर्णपणे जळालेल्या अवस्थेत होता. किरणचा नवरा नागेश सावंत रडत होता आणि किरणने स्वत:ला पेटवून घेतल्याचं तो सांगत होता.
किरणच्या वडिलांनाही तो मृतदेह ओळखता येत नव्हता. पण नागेशने तो मृतदेह किरणचाच असल्याचं सांगितलं. त्यामुळे, ”माझ्या मुलीला कोणी मारलं, याची चौकशी करा,” अशी मागणी किरणच्या वडिलांनी पोलिसांकडे केली. पोलिसांनी सुरुवातीला अकस्मात मृत्यूची नोंद केली आणि मृतदेहाचे अवशेष फॉरेन्सिक तपासणीसाठी पाठवले. मात्र, काही दिवसांनी पोलिसांना धक्कादायक माहिती मिळाली. ज्या किरणचा मृत्यू झाल्याचं म्हटलं जात होतं, ती चक्क जिवंत असून सातारा जिल्ह्यातील कराड इथे एका व्यक्तीसोबत सापडली आहे.
आता पोलिसांनी संशय व्यक्त केला आहे की, कराडमध्ये सापडलेला व्यक्ती किरणचा प्रियकर आहे. पोलिसांनी दिलेल्या माहितीनुसार, आपल्या प्रियकरासोबत पळून जाण्यासाठी किरणने दुसऱ्या एका महिलेचा मृतदेह आपल्या घरासमोर आणून जाळला आणि स्वत:च्या मृत्यूचा बनाव रचला असावा. मंगळवेढ्यात सापडलेल्या मृतदेहाचे अवशेष सोलापूरच्या फॉरेन्सिक लॅबमध्ये डीएनए तपासणीसाठी पाठवले आहेत. या डीएनए अहवालानंतरच त्या मृत महिलेची खरी ओळख पटेल. पोलीस या प्रकरणाचा वेगाने तपास करत आहेत.